Skip to main content

ბრაზის მართვის პროგრამა

თუ თქვენი სიცოცხლე საფრთხეშია, ნუ გამოიყენებთ ამ ვებსაიტს. დაუყოვნებლივ დარეკეთ 911.

Facebook X-twitter Linkedin Instagram Vimeo

ხშირად დასმული კითხვები

რა არის ბრაზის მართვის პროგრამა?
ბრაზის მართვის პროგრამა წარმოადგენს სტრუქტურირებულ საგანმანათლებლო პროგრამას, რომელიც შექმნილია სიბრაზის უკეთ გააზრების, პირადი გამომწვევი ფაქტორების ამოცნობისა და ემოციური თვითრეგულაციის პრაქტიკული უნარების განვითარების ხელშესაწყობად.
წარმოადგენს თუ არა ეს კურსი თერაპიას ან ფსიქოლოგიურ მკურნალობას?
არა. ეს კურსი საგანმანათლებლო ხასიათისაა და არ წარმოადგენს ფსიქოლოგიურ ან ფსიქიატრიულ შეფასებას, დიაგნოსტიკას, ფსიქოთერაპიას, ფსიქოლოგიურ კონსულტაციას, იურიდიულ კონსულტაციას ან რომელიმე სხვა პროფესიულ მომსახურებას. კურსში მონაწილეობა არ წარმოშობს თერაპევტსა და კლიენტს, ფსიქოლოგსა და კლიენტს, კონსულტანტსა და კლიენტს ან ადვოკატსა და კლიენტს შორის პროფესიულ ურთიერთობას. ფსიქიკური ჯანმრთელობის საკითხებთან დაკავშირებით პროფესიული დახმარების მიღების მსურველთათვის რეკომენდებულია შესაბამისი კვალიფიკაციის მქონე სპეციალისტისთვის მიმართვა. პირებს, რომლებსაც ესაჭიროებათ ფსიქოთერაპია, კონსულტირება ან სხვა ფსიქიკური ჯანმრთელობის სერვისები, ვურჩევთ, პირდაპირ დაუკავშირდნენ შესაბამის მარეგულირებელ ორგანოს კვალიფიციური და ლიცენზირებული სპეციალისტის მოსაძებნად. კვებეკში ეს შეიძლება იყოს Ordre des psychologues du Québec (კვებეკის ფსიქოლოგთა კოლეგია). სხვა ქვეყანაში / რეგიონში მცხოვრები მონაწილეები უნდა დაუკავშირდნენ შესაბამის პროფესიულ ორგანოს ან დაწესებულებას.
ვისთვის არის განკუთვნილი ეს კურსი?
კურსი განკუთვნილია იმ პირებისთვის, ვისაც სასამართლოს გადაწყვეტილებით დაევალათ ბრაზის მართვის პროგრამის გავლა, ასევე პრობაციაზე ან პირობით ვადამდე გათავისუფლებაზე მყოფი პირებისთვის და მათთვის, ვინც პროგრამაში ჩართულია ადვოკატის, პრობაციის ოფიცრის, სოციალური მუშაკის, დამსაქმებლის ან სხვა უფლებამოსილი პირის ან ორგანიზაციის რეკომენდაციით. პროგრამა ასევე განკუთვნილია ყველასთვის, ვისაც სურს გაიღრმავოს ცოდნა თვითრეგულაციის უნარების შესახებ, გაიუმჯობესოს კომუნიკაციის სტრატეგიები, კონსტრუქციულად მართოს კონფლიქტები და რთულ სიტუაციებში უფრო გააზრებულად იმოქმედოს.
აღიარებულია თუ არა ეს კურსი სასამართლოების მიერ?
პროგრამა შემუშავებულია იმ სტანდარტების გათვალისწინებით, რომლებიც, როგორც წესი, მოითხოვება სასამართლოების, პრობაციის სამსახურებისა და იურიდიული პროფესიის სხვა წარმომადგენლების მიერ კანადაში. პროგრამის აღიარების ან მიღების შესახებ გადაწყვეტილებას თითოეულ შემთხვევაში დამოუკიდებლად იღებს მოსამართლე, პრობაციის ოფიცერი ან სხვა უფლებამოსილი ორგანო. ამიტომ, რეკომენდებულია, ჩარიცხვამდე, მონაწილეებმა გადაამოწმონ კურსის თავსებადობა და ვალიდურად აღიარების შესაძლებლობა, იმ ორგანოსთან ან უფლებამოსილ პირთან, რომელმაც პროგრამის გავლა მოითხოვა. კურსის დასრულება არ იძლევა რაიმე კონკრეტული სამართლებრივი შედეგის გარანტიას.
იძლევა თუ არა კურსის დასრულება სასჯელის შემსუბუქების ან ბრალდების მოხსნის გარანტიას?
არა. კურსის დასრულება არ წარმოადგენს გამართლების, სასჯელის შემსუბუქების, ბრალდების მოხსნის, საქმის შეწყვეტის ან სხვა სამართლებრივი შედეგის მიღების გარანტიას. ყველა გადაწყვეტილებას სამართლებრივ საკითხებთან დაკავშირებით იღებს მხოლოდ სასამართლო ან სხვა უფლებამოსილი ორგანო, კონკრეტული საქმის გარემოებების გათვალისწინებით.
როგორია კურსის სტრუქტურა?
პროგრამა შედგება ექვსი თანმიმდევრულად შედგენილი მოდულისგან, რომლებიც ეტაპობრივად აცნობს მონაწილეებს სიბრაზის გააზრებისა და მართვის პრინციპებს. მოდულები მოიცავს ემოციურ გაცნობიერებას, სიბრაზის გამომწვევ ფაქტორებს, უმართავი სიბრაზის სამართლებრივ და სოციალურ შედეგებს, ეფექტურ კომუნიკაციასა და კონფლიქტების მოგვარებას, თვითრეგულაციისა და დაძლევის პრაქტიკულ სტრატეგიებს, ურთიერთობების აღდგენასა და პირად პასუხისმგებლობას, ასევე სიბრაზის მართვის პირადი გრძელვადიანი გეგმის შემუშავებას. თითოეული მოდული აერთიანებს თეორიულ მასალას, პრაქტიკულ სავარჯიშოებს, თვითშეცნობის აქტივობებსა და ცოდნის შეფასების კომპონენტებს.
რამდენი დროა საჭირო კურსის დასასრულებლად?
მონაწილეთა უმეტესობა პროგრამას დაახლოებით 26–30 საათში ასრულებს. ვინაიდან, კურსი სრულად დამოუკიდებელი ტემპით მიმდინარეობს, დასრულების ხანგრძლივობა შესაძლებელია განსხვავდებოდეს თითოეული მონაწილის კითხვის ტემპის, პრაქტიკულ დავალებებში ჩართულობისა და ინდივიდუალური სასწავლო სტილის მიხედვით.
ტარდება თუ არა კურსი დისტანციურად?
დიახ. პროგრამა დისტანციურ ფორმატში ხორციელდება და ხელმისაწვდომია კომპიუტერის, პლანშეტის ან სმარტფონის გამოყნებით. მონაწილეებს შეუძლიათ ნებისმიერ დროს შევიდნენ სისტემაში და სასწავლო პროცესი საკუთარი გრაფიკისა და შესაძლებლობების შესაბამისად დაგეგმონ.
რა ტიპის სასწავლო აქტივობებს მოიცავს კურსი?
კურსი მოიცავს მრავალფეროვან პრაქტიკულ და ინტერაქტიურ აქტივობებს, რომლებიც ხელს უწყობს მიღებული ცოდნის განმტკიცებასა და პიროვნულ თვითშეცნობას. მონაწილეები ასრულებენ სცენარებზე დაფუძნებულ სავარჯიშოებს, ცოდნის შემოწმების ტესტებს, დავალებებს, აწარმოებენ დღიურს და ასრულებენ თვითრეგულაციის პრაქტიკულ სავარჯიშოებს. ეს აქტივობები ეხმარება მათ მიღებული ცოდნის რეალურ ცხოვრებაში გამოყენებასა და პრაქტიკული უნარების განვითარებაში.
რომელ ენებზეა შესაძლებელი კურსის გავლა?
კურსი ხელმისაწვდომია ინგლისურ, ფრანგულ, სომხურ, ქართულ, თურქულ, სპარსულ, რუსულ და უკრაინულ ენებზე, რათა უზრუნველყოფილი იყოს პროგრამის მაქსიმალური ხელმისაწვდომობა და ინკლუზიურობა.
გაიცემა თუ არა სერტიფიკატი კურსის დასრულების შემდეგ?
დიახ. მონაწილეები, რომლებიც წარმატებით დაასრულებენ პროგრამის ყველა მოდულს, მიიღებენ ორენოვან (ინგლისურ და ფრანგულ ენებზე შედგენილ) სერტიფიკატს. სერტიფიკატი შესაძლებელია ჩამოიტვირთოს, ამოიბეჭდოს ან წარდგენილ იქნეს მოთხოვნის შესაბამისად, საჭიროებისამებრ.
შესაძლებელია თუ არა კურსის დასრულების დამადასტურებელი დოკუმენტის პირდაპირ სასამართლოში ან სხვა უფლებამოსილ ორგანოში გაგზავნა?
დიახ. მონაწილის წინასწარი თანხმობის საფუძველზე, კურსის დასრულების დამადასტურებელი დოკუმენტი შეიძლება პირდაპირ გაეგზავნოს სასამართლოს, ადვოკატს, პრობაციის ოფიცერს, დამსაქმებელს ან სხვა უფლებამოსილ პირს ან ორგანიზაციას სასამართლოს ანგარიშგების (Court Reporting) მომსახურების მეშვეობით.
როგორ არის დაცული მონაწილეთა კონფიდენციალურობა?
მონაწილეთა პირადი მონაცემების დაცვა ხორციელდება სიბრაზის მართვის პროგრამის კონფიდენციალურობის პოლიტიკის შესაბამისად. კურსის ფარგლებში შექმნილი ჩანაწერები, რეფლექსიური დღიურები, თვითშეფასების შედეგები და სხვა სასწავლო მასალა არ გადაეცემა მესამე პირებს მონაწილის თანხმობის გარეშე. ინფორმაცია სასამართლოს, პრობაციის ოფიცრის, ადვოკატის ან სხვა უფლებამოსილი ორგანოსთვის გადაიგზავნება მხოლოდ მონაწილის თანხმობის საფუძველზე ან იმ შემთხვევაში, თუ ამის ვალდებულებას კანონი წარმოშობს.
შესაძლებელია თუ არა კურსის გავლა პირადი განვითარების მიზნით, სასამართლოს ან სხვა სამართლებრივი მოთხოვნის გარეშე?
დიახ. მიუხედავად იმისა, რომ ბევრი მონაწილე პროგრამაში ერთვება სასამართლოს, დამსაქმებლის ან სხვა უფლებამოსილი ორგანოს მოთხოვნის საფუძველზე, კურსი თანაბრად საინტერესო და სასარგებლოა ყველასთვის, ვისაც სურს უკეთ გაიაზროს საკუთარი ემოციები, გაიუმჯობესოს კომუნიკაციის უნარები, განამტკიცოს პირადი და პროფესიული ურთიერთობები და შეიმუშაოს სტრესის, იმედგაცრუებისა და სიბრაზის მართვის ჯანსაღი და ეფექტური სტრატეგიები.

კიდევ გაქვთ შეკითხვა?

დაგვიკავშირდით და სიამოვნებით გაგიწევთ კონსულტაციას, პროგრამის გავლასთან დაკაშვირებით.
გამოგვიგზავნეთ წერილი

ნინას შესახებ

ნინა მრავალენოვანი პედაგოგია, რომელსაც აკადემიური განათლება მიღებული აქვს პედაგოგიკის, პოლიტიკურ მეცნიერებათა, საერთაშორისო ურთიერთობებისა და ადამიანის უფლებების მიმართულებით. მიღებული აქვს პედაგოგიკის (განათლების) ბაკალავრის ხარისხი ილიას სახელმწიფო უნივერსიტეტში (საქართველო) და პოლიტიკურ მეცნიერებათა, საერთაშორისო ურთიერთობებისა და ადამიანის უფლებების ბაკალავრის ხარისხი პადუას უნივერსიტეტში (იტალია). აგრეთვე, გავლილი აქვს ეროვნული უსაფრთხოებისა და საჯარო პოლიტიკის სასწავლო კურსი საქართველოს სტრატეგიისა და საერთაშორისო ურთიერთობების კვლევის ფონდში, RAND კორპორაციასთან თანამშრომლობით. ნინას პროფესიული გამოცდილება მოიცავს ადრეული ასაკის ბავშვთა განათლებას, საზოგადოებრივ და კულტურულ ორგანიზაციებში საქმიანობას, ადმინისტრირებასა და ბიზნესის მართვას. მრავალმხრივმა გამოცდილებამ განუმტკიცა კომუნიკაციის, ორგანიზებისა და სხვადასხვა კულტურულ გარემოში ადამიანებთან ურთიერთობის მოქნილი უნარები. ნინა ფლობს ინგლისურ, ფრანგულ, სომხურ, რუსულ, ქართულ და იტალიურ ენებს. მისი ფართო გამოცდილება და ხედვა ზედმიწევნით შეესაბამება კანადის სხვადასხვა კულტურული და საზოგადოებრივი ჯგუფის წარმომადგენელ მონაწილეებთან მუშაობას. ნინას როლი ბრაზის მართვის პროგრამაში საგანმანათლებლო ხასიათისაა. პროგრამა მონაწილეებს სთავაზობს სტრუქტურირებულ სწავლებასა და პრაქტიკული უნარების განვითარებას და არ წარმოადგენს ფსიქოლოგიური შეფასების, ფსიქოთერაპიის ან სხვა იმ მომსახურებების შემცვლელს, რომლებსაც შესაბამისი რეგულირების ქვეშ მყოფი პროფესიონალები ახორციელებენ.

ჩვენი ლოგოს მნიშვნელობა

ჩვენი ლოგო ბრაზის მართვის პროგრამის ფილოსოფიას ასახავს: მიზანი ბრაზის აღმოფხვრა ან ჩახშობა კი არა, არამედ მისი გააზრება, მასზე კონსტრუქციული რეაგირება და თვითკონტროლის გაძლიერებაა. ერთმანეთზე გადაფარული ფორმები ემოციების სირთულეს განასახიერებს. ბრაზი იშვიათად არსებობს განცალკევებით - ხშირად ის სტრესს, იმედგაცრუებას, შიშსა და გულისტკივილს ერწყმის. ცენტრისკენ მიმართული მოძრაობა მზარდ თვითშემეცნებას განასახიერებს. რაც უფრო ახლოს მოდის ფენები ერთმანეთთან, მით უფრო მკაფიო ხდება ცენტრი, რაც ასახავს პროცესს, როდესაც ადამიანი ამოიცნობს გამომწვევ მიზეზებსა და განმეორებად ქცევით ნიმუშებს, ის უფრო შეგნებულად იწყებს რეაგირებას. რბილი, არარეგულარული ფორმები გვამცნობს, რომ ემოციები დინამიკურია და ცვალებადი. სათანადო უნარების დახმარებით ადამიანს შეუძლია თავად განსაზღვროს საკუთარი რეაქცია და არ დაემორჩილოს ბრაზს. ლურჯი ფერი სიმშვიდის, სტაბილურობისა და ნდობის სიმბოლოა, გამჭვირვალობა კი სიცხადეს აღნიშნავს - უნარს, დავინახოთ, რა იმალება უშუალო რეაქციის მიღმა, და იმპულსური მოქმედებიდან გადავიდეთ გააზრებულ რეაგირებასა და თვითფლობაზე.